Përjashtimi i 11 deputetëve nga PD, reagon Gazment Bardhi

Kryetari i Grupit Parlamentar të Partisë Demokratike, Gazment Bardhi, ka reaguar në lidhje me publikimin e vendimit për përjashtimin nga PD të 11 deputetëve që i janë bashkuar ish-kryeministrit Sali Berisha.

Bardhi nënvizon se Lulzim Basha nuk ka as legjitimitetin, por as forcën për të përjashtuar askënd nga Partia Demokratike.

Ai fton kolegët e partisë Demokratike që bashkohen në luftën kundër qeverisë dhe jo të merren me vendime që dobësojnë opozitën dhe forcojnë pushtetin.

“Merreni me të qeshur dhe boll harxhuat rreshtat me çfarë bën Lulzim Basha. Përvecse humorit tek çdo mendje normale njerëzore, kanë zero efekt. Është fiks si pohimi “falë mundit tuaj nga sot Edi Rama nuk është më Kryeministër”, që demokratët e dëgjonin pas çdo proteste në 10 vjet opozitë!

Si njëri nga deputetët e PD, Lulzim Basha nuk ka as legjitimitetin, por as forcën për të përjashtuar askënd. Ndryshimi i përbërjes së grupit parlamentar mund të ndodhë vetëm me vendim të grupit parlamentar. Përtej kësaj, asnjë copë letre, asnjë firmë dhe asnjë vulë e keqpërdorur në ilegjitimitet, nuk ka vlerë.

Ftoj secilin koleg të përqëndrohet tek skandali i Edi Ramës me korruptimin e një zyrtari të FBI, që pranoi fajësinë dhe marrëdhënien e biznesit me Kryeministrin, si dhe tek sjellja skandaloze e Edi Ramës në raport me zhvillimet në Kosovë.

Aktet qesharake që bëhen për të zhvendosur vëmendjen nga këto dy çështje nuk mund të marrin asnjë sekond nga veprimtaria e Grupi Parlamentar të PD. Zhvendosja e vëmendjes është interes i Edi Ramës, por jo i demokratëve dhe opozitarëve.

Një ftesë të sinqertë kam edhe për kolegun Lulzim Basha. Në vend të letrave pavlerë që synojnë përçajnë opozitën dhe mbajtjen ndezur të konfliktit mes vetes, të përqendrohet në çështje që nuk i shërbejnë forcimit të pushtetit të Edi Ramës, por dobësimit të tij”, deklaron Bardhi në reagimin e tij.

LEXONI GJITHASHTU:

• Basha pret reporterët e KiE: Qytetarët të zgjedhin deputetin dhe presidentin
• Kryesia e Partisë Demokratike përjashton 11 deputetë (Emrat)