Përkeqësim i motit, Adiola Bani: Zonat që do jenë më të rrezikuara nga reshjet e shiut

Duke nisur nga dita e sotme e në vazhdim vendi ynë pritet që të përfshihet nga një mot i pa qëndrueshëm.

Përgjatë gjithë javës parashikohen reshje intensive, pothuajse në të gjithë territorin e Shqipërisë. Moti me reshje të dendura pritet që të sjellë rritje të prurjeve në lumenj.

Përmbytje mund të shkaktohen nga lumi Drin-Buna dhe Liqeni i Shkodrës me prurjet maksimale, të cilat parashikohen të arrijnë zonat e rrezikuara në datën 12 Janar 2021.

Në lidhje me këtë situatë, Euronews Albania bisedoi me specialisten e Meteoalb Adiola Bani, e cila tha se zonat më të rrezikuara nga reshjet janë zonat veriore dhe veri-perëndimore të Shqipërisë.

Ajo u shpreh se për shkak të reshjeve të shiut, që do të variojnë me intensitet të lartë, pritet të ketë fryrje të lumenjve.

“Zonat më problematike paraqiten zonat veriperëndimore dhe veriu i territorit shqiptar, aty ku kemi pasur reshjet e konsiderueshme. Këto zona janë të rrezikuara, sepse ka reshje të vazhdueshme. Presim që reshjet të vijojnë në deri më 12 janar. Këto ditë do të ketë reshje me intensitet mesatar deri në reshje intensive”, tha ajo.