Përmbytje në Durrës/ Uji depërton në disa banesa te ‘Ura e Dajlanit’ dhe ish-Këneta

Për shkak të reshjeve të intensifikuara të shiut, në qytetin e Durrësit janë shfaqur disa problematika, të cilat po monitorohen dhe trajtohen nga strukturat përkatëse.

Një eskavator i Drejtorisë së Ujitjes dhe Kullimit ka mbërritur në Kanalin e Ujrave të Larta për të realizuar ndërhyrjet dhe pastrimin e kanaleve të bllokuara.

Ka pasur rritje të nivelit të ujit në rrugë, duke shkaktuar vështirësi në qarkullimin e mjeteve dhe lëvizjen e këmbësorëve.

Uji ka mbuluar disa zona të qytetit, përfshirë Shkozet, ish-magazinat e Agrotransportit, Zona e Plazhit, ish-Këneta, Stadiumi dhe Lagja “17 Nëntori” ku ka pasur depërtime të ujit në oborret e disa shtëpive në zonën e njohur si “Ura e Dajlanit” dhe ish-Këneta.

Niveli i ujit në Kanalin e Ujrave të Larta, i cili ndodhet në unazën e qytetit, ka arritur një nivel kritik, duke shkaktuar shqetësime për përmbytjet.

Po ashtu, janë evidentuar probleme me praninë e ujit në sipërfaqe bujqësore në njësinë administrative Sukth.

Strukturat vendore janë angazhuar për të riparuar pasojat e krijuara dhe po punojnë intensivisht për të menaxhuar situatën.

Agjencia Kombëtare e Mbrojtjes Civile do të vijojë të ndjekë dhe koordinojë forcat deri në normalizimin e plotë të situatës.

Kujtojmë se që prej orëve të para të mëngjesit vendi ynë është përfshirë nga reshjet e shiut.

Në disa qytete reshjet kanë shkaktuar përmbytje dhe probleme duke mos lejuar kalimin e këmbësorëve dhe automjeteve.

Ministria e mbrojtes ka njoftuar se në orët në vijim pritet reshje mesatare deri lokalisht intensive në qarqet Vlorë dhe Gjirokastër.

Në qarqet Shkodër, Lezhë, Durrës dhe Tiranë priten reshje mesatare, shoqëruar me shtrëngata.

Në pjesën tjetër të vendit priten reshje te dobëta deri lokalisht mesatare.

Ndërkohë shtrëngatat dhe intensiteti i lartë i reshjeve për momente të shkurtra mund të krijojnë probleme të ndryshme si dhe vërshime të ujit në zonat urbane.

LEXONI GJITHASHTU:

• Durrësi “nën pushtetin” e ujit, bllokohen rrugët pas reshjeve të shiut
• Parashikimi i motit për fundin e janarit, kur pritet të fillojnë reshjet