Përplasen kokë më kokë automjetet në Cërrik, plagosen 2 vajza

Një aksident rrugor është regjistruar në unazën e qytetit të Cërrikut mbrëmjen e së martës, ku dy automjete janë përplasur me njëra-tjetrën.

Si pasojë e përplasjes, dy vajza kanë mbetur të lënduara dhe janë transportuar menjëherë për ndihmë mjekësore në Spitalin Rajonal të Elbasanit, ku po marrin trajtimin e nevojshëm shëndetësor.

Fatmirësisht, mësohet se ato ndodhen jashtë rrezikut për jetën. Njëri prej automjeteve të përfshira në aksident mbante targa të Kosovës.

Nga hetimet paraprake dyshohet se shkak i aksidentit ka qenë parakalimi i gabuar i njërit prej mjeteve, i shoqëruar me shpejtësinë tej normave të lejuara, çka ka bërë të pamundur shmangien e përplasjes.

Në vendngjarje kanë mbërritur shërbimet e Policisë Rrugore, të cilat po vijojnë punën për zbardhjen e plotë të rrethanave të aksidentit.