Përshtatën lokalin për lojra fati, në kërkim dy organizatorët në Shkodër! Në pranga punonjësi

Një 30-vjeçar është vënë në pranga këtë të enjte nga policia e Shkodrës, pasi punonte në një lokal ku ushtrohej veprimtaria e lojrave të fatit.

Në kuadër të operacionit të koduar “Gaminator”, në pranga ka rënë shtetasi P. P., 30 vjeç, banues në Fushë Arrëz, punonjës i lokalit. Ndërkohë, janë shpallur në kërkim shtetasit I. T., 30 vjeç, dhe G. P., 39 vjeç, të dy banues në Tiranë, të cilët dyshohet se janë organizatorët e kësaj veprimtarie të paligjshme.

Sakaq, u sekuestruan në cilësinë e provës materiale 2 makineta, 1 pajisje kompjuterike, 1 celular dhe 140 000 lekë.

“Strukturat e Seksionit për Hetimin e Krimit Ekonomik dhe Financiar, Seksionit të Mbështetjes Operacionale Hetimore të DVP Shkodër dhe shërbimet e Komisariatit të Policisë Pukë, në kuadër të kontrolleve për parandalimin dhe goditjen e veprimtarive të paligjshme në fushën e lojërave të fatit, bazuar dhe në informacionet e siguruara në rrugë operative, organizuan dhe finalizuan operacionin e koduar “Gaminator”.  

Gjatë operacionit të zhvilluar në qytetin e Fushë Arrëzit, u konstatua se në ambientet e një lokali zhvillohej aktiviteti i kundërligjshëm i organizimit të lojërave të fatit.

Në vijim të veprimeve procedurale:

-u arrestua në flagrancë shtetasi P. P., 30 vjeç, banues në Fushë Arrëz, punonjës i lokalit; 

-u shpallën në kërkim shtetasit I. T., 30 vjeç dhe G. P., 39 vjeç, të dy banues në Tiranë, të cilët dyshohet se janë organizatorët e kësaj veprimtarie të paligjshme. 

Gjatë kontrollit në lokal, u gjetën dhe u sekuestruan në cilësinë e provës materiale, 2 makineta, 1 pajisje kompjuterike, 1 celular dhe 140 000 lekë që dyshohet se janë përfituar nga kjo veprimtari e paligjshme. 

Punohet për kapjen e 2 shtetasve në kërkim dhe për dokumentimin e plotë të kësaj veprimtarie të paligjshme”, thueht në njoftimin  e policisë.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.