Përzgjedhja e teksteve të historisë, proces i lidhur me politikën, thotë Neritan Ceka

Përzgjedhja e teksteve të historisë që përdoren në shkolla, një proces i lidhur me politikën, deklaroi për Euronews Albania historiani Neritan Ceka.

Historiani sqaroi se aktualisht ka një monopolizim të teksteve mësimore, ku shtëpitë botuese e dinë se kë libër do prodhojnë dhe nuk kryhen kontrolle.

“Në arsimin tonë është gabim sot monopolizimi i teksteve mësimore. Pati një përudhë që ishin tekstet me përzgjedhje, ku mësuesi mund të zgjidhte. Dihet se kush do ta marrë tani librin e historisë së Shqipërisë. Është një biznes i lidhur me politikën, si rrjedhim shtëpia botuese e ka sigurt, nuk ka një kontroll”, u shpreh ai.

Z.Ceka theksoi se historia vetëm shkruhet, nuk mund të rishkruhet, pasi është një punë shkencore, e bazuar në një sërë studimesh.

“Bëhet fjalë për disa pika të nxehta, të cilat janë bërë pjesë, jo vetëm e studimeve historike, ku ka debate dhe më të gjera, sidomos debatin social, ku grupohen edhe grupe me interesa politike. Nuk është çështje datash, kush e çliroi, çfarë pasoja solli çlirimi, nuk kanë të bëjnë në të vërtetë më atë që ishte lufta”, tha ai, teksa komentoi datat 28-29 nëntor për çlirimin e vendit.