Peshkimi me grep, qytetarët preferojnë një fundjavë në natyrë dhe në ajër të pastër

Peshkimi është kthyer në një hobi, për shumë qytetarë. Disa kalojnë kohën e lirë, disa të tjerëve u ofron qetësi, e të tjerë për të zënë grepi ndonjë peshk.

Çdo ditë ky lloj sporti po tërheq gjithnjë e më shumë njerëz. Në hidrovoret e ultësirës perëndimore dhe në afërsi të zonave bregdetare të Fierit çdo ditë me dhjetëra peshkatarë amatorë kalojnë kohën e tyre të lirë. Vitet e fundit numri i atyre që praktikojnë peshkimin amator është rritur ndjeshëm si një kundërpeshë e jetës me ritme të shpejta, kryesisht në qytete.

“Unë kam 20 vjet që merrem me peshkim këtu, jo me licencë. E kemi pasion dhe dalim këtej nga deti për të peshkuar”, thotë një burrë.

Po midis peshkatarëve që ruajnë secili sekretet e kësaj gjuetie, ka edhe të rinj që vijnë të bëjnë diçka ndryshe afër natyrës.

“Ka shumë nga këta që vijnë, moshë e madhe kryesisht, kalojnë kohën. Ka disa që e shesin peshkun, disa që e hanë për vete”, shprehet një djalë i ri.

Një fundjavë e kaluar më pranë natyrës, ajrit të pastër, peshkimi me grep, është një tjetër alternativë për këdo.