Pezullimi i 2 prokurorëve të SPAK, kreu i KLP: Rekurs në Gjykatë të Lartë

“Do të bëjmë rekurs në Gjykatën e Lartë”. Kështu deklaron për Euronews Albania kryetari i Këshillit të Lartë të Prokurorisë, Alfred Balla për pezullimin nga detyra të 2 prokurorëve të SPAK.

“Ne na duket i kundërligjshëm ai vendim dhe po përgatisim rekurs pranë Gjykatës së Lartë si dhe do kërkojmë nga Gjykata e Lartë pezullim ekzekutim vendimi. Nuk mundet gjykata të zëvendësojë këshillin kur është diskrecioni i secilit anëtar se sa pikë i jep një kandidati”, u shpreh ai.

Ditën e sotme, dy prokurorë të Strukturës së Posaçme AntiKorrupsion (SPAK), Ervin Gogaj dhe Alfred Shehu u pezulluan nga detyra.

Shkak për pezullimin e tyre është bërë ankimi i prokurores Sonila Muhameta,j e cila u skualifikua nga Këshilli i Lartë i Prokurorisë (KLP).

Të dy prokurorët të cilët tashmë janë të pezulluar dhe Muhametaj, garuan për dy vendet vakante të shpallura nga KLP-ja për në SPAK. Muhametej nuk u përzgjodh dhe e ankimoi vendimin në Gjykatën Administrative.

Gjykata i ka vlerësuar si jo të rregullta procedurat për zgjedhjen e dy prokurorëve, Gogajt dhe Shehut dhe se duhet rishikuar procedura në të cilën është zhvilluar gara.

LEXONI GJITHASHTU:

• Pezullohen nga detyra dy prokurorë të SPAK-ut