Piktorët e së ardhmes, 25 artistë të vegjël pjesë e organizimit në Kolonjë

Për të pestin vit radhazi në Kolonjë organizohet ‘Kolonia e piktorëve të vegjël’.

Edhe këtë vit pjesë e këtij organizimi janë bërë piktorë të moshës nga 8-16 vjeç, pjesa më e madhe e së cilëve kanë guxuar të hedhin në telajo ngjyrat e krijimtarisë së tyre në stinën e vjeshtës.

Ata janë përqendruar në punimet e tyre në vendet turistike të krahinës së njohur duke filluar nga Borova, Rehova, Sheleguri dhe Leskoviku.

“Unë jam 16 vjeç dhe kam zgjedhur një pamje të fshatit Rehovë, me pëlqejnë karakteristikat, gurët që e banorët e këtij vendi kanë ndërtuar shumë mirë dhe po mundohem të bëj më të mirën time në pikturë. Unë afërisht kam 4 vite që merrem me pikturë dhe mendoj se do e zhvilloj dhe me vonë”, thotë një artist i vogël.

“Unë jam Maria Peci, kam rreth 5 vite që pikturoj. Sot me ka tërhequr pamja magjepsëse e këtij fshati të bukur. Po pikturoj shtëpinë përballë me gurë”, shprehet një tjetër.

Të gjitha punimet e tyre do të paraqiten në ekspozitën e kësaj kolonie të veçantë ne qendër të qytetit të Ersekës, koloni e cila është e vetmja e kësaj moshe në vendin tonë.

Në koloninë e këtij viti të piktorëve të vegjël kanë marrë pjesë 25 piktorë, pjesa më e madhe e të cilëve janë nga Korça. Pjesë e kësaj kolonie janë bërë edhe piktorë të cilët kanë ardhur nga shkolla të ndryshme të fshatrave të bashkive të juglindjes së vendit.

LEXONI GJITHASHTU:

• Albania Dance Meeting, shfaqja e koreografisë mbledh artistët në Gjirokastër
• Vila e ish-diktatorit do shndërrohet në rezidencë artistësh. I pranishëm Macron