Pilotët italianë zgjojnë Gjirokastrën, aerodromi i qytetit, qendër e avioturizmit

Pas gati 90-vitesh në aerodromin turistiko-sportiv të Gjirokastrës janë rikthyer fluturimit e avionëve nga vende të ndryshme. Kanë qenë 6 avionë të vegjël të ardhur nga Italia të cilët janë ulur në aerodrom pa pasur nevojë të përpunojnë dokumentacionin përkatës në Rinas.

Pilotët italianë shprehen se tashmë statusi i ri i këtij aerodromi fushor është një nxitje për zhvillimin e avioturizmit.

“Me sa kemi parë kur fluturojmë është një vend i mrekullueshëm, me siguri do të rikthehemi sërish dhe së bashku me ne do të jenë edhe pilotë të tjera sepse do t’ju themi fjalët më të mira për mikpritjen. Jam I sigurt që në këtë mënyrë do të zhvillohet avioturizmi”, thotë një turist italian.

“Është hera e parë për mua që  jam në Gjirokastër  jemi të kënaqur që morëm pjesë në një aktivitet të tillë, është mjaft e dobishme për avioturizmin dhe fluturimin e avionëve të vegjël nga Italia, jemi shumë më afër nga sa mendohet”, shprehet një tjetër.

Tashmë për pilotët që kanë si destinacion Gjirokastrën si dhe jugun e vendit në aerodrom ofrohet shërbimi doganor dhe policor, duke mundësuar fluturimin direkt nga vendet përkatëse.

“Tashmë ne kemi çelur rrugët për zhvillimin e turizmit të ajrit në Shqipëri dhe këtu në aerodromin e Gjirokastrës , ju urojmë mirëseardhjen të gjithë pilotëve të sotëm që vijnë nga Italia  dhe së shpejti presim edhe turistë të tjerë nga bota të vijnë këtu në aerodromin e Gjirokastrës”, thotë Militiadhis Kocajeridhis, përfaqësues i Aviacionit Civil.

Në kuadër të rijetëzimit të aerodromit të Gjirokastrës në fundjavë u nënshkrua edhe një marrëveshje binjakëzimi me aeroportin e Sibarit në Itali. Përgjatë këtij viti në aerodromin e Gjirokastrës janë zhvilluar aktivitete të shumta duke përfshirë edhe organizimin e  Kampionatit të 8-të Europian të Sporteve të Ajrit.