Pjesë e një grupi të strukturuar kriminal, 46-vjeçarit i sekuestrohen pasuritë

Dy apartamente dhe një automjet në pronësi të 46-vjeçarit Flori Pali janë sekuestruar.

Policia e Shtetit informon se Pali është akuzuar si pjesëtar i një grupi të strukturuar kriminal me aktivitet në fushën e narkotikëve dhe dyshohet se pasuritë janë përfituar nga krimi.

46-vjeçari është në hetim për veprat penale “Prodhimi dhe shitja e narkotikëve” dhe “Trafikimi i narkotikëve”, kryer në formën e grupit të strukturuar kriminal, si dhe për veprën penale “Pastrimi i produkteve të veprës penale ose të veprimtarisë kriminale”.

“Specialistët e Njësisë “E” për Hetimin e Krimeve Ekonomiko-Financiare në DPPSH, në kuadër të një procedimi pasuror, të iniciuar me qëllim gjurmimin, lokalizimin dhe sekuestrimin e pasurive që rrjedhin nga veprimtari të ndryshme kriminale, kanë ekzekutuar vendimin e Gjykatës së Posaçme të Shkallës së Parë për Korrupsionin dhe Krimin e Organizuar, e cila ka vendosur sekuestrimin e pasurive të shtetasit F.P, 46 vjeç, banues në fshatin Ungrej, Lezhë”, thuhet ndër të tjera në njoftimin e policisë.