Plagoset me thikë punonjësi i lavazhit në Shkodër, arrestohet autori 78-vjeçar

Një 38-vjeçar është plagosur me thikë mesditën e së mërkurës në qytetin e Shkodrës.

Sipas informacioneve paraprake, ngjarja ka ndodhur në lagjen “Rus”, ku i plagosuri Artan Bobnaj punonte në një lavazh, teksa autori Musa Çinari është vënë në pranga.

Mësohet se plagosja ka ardhur pas një konflikti të çastit mes dy personave. Policia ndodhet në vendngjarje.

Njoftimi i policisë

Shkodër

Plagosi me mjet prerës (thikë), një 38-vjeçar, pas një konflikti të çastit, identifikohet dhe shoqërohet menjëherë nga Policia, autori i dyshuar.

Rreth orës 11:30, në lagjen “Rus”, dyshohet se pas një konflikti të çastit, është plagosur me mjet prërës (thikë), shtetasi A. B., 38 vjeç, banues në fshatin Bardhaj, Shkodër, i cili ndodhet në spitalin e Shkodrës, në kujdesin e mjekëve.

Menjëherë pas marrjes së njoftimit, shërbimet e Policisë kanë organizuar punën, me qëllim zbardhjen e rrethanave të këtij rasti, si dhe për identifikimin dhe kapjen e autorit.

Falë veprimeve të shpejta dhe profesionale operacionale, shërbimet e Policisë identifikuan dhe shoqëruan menjëherë në ambientet e Policisë, autorin e dyshuar të kësaj ngjarjeje, shtetasin M. Ç., 78 vjeç, banues në lagjen Partizani, Shkodër, për kryerjen e veprimeve të mëtejshme procedurale.

Grupi hetimor vijon punën për zbardhjen dhe dokumentimin e plotë ligjor të këtij rasti.