Një ngjarje e rëndë ka ndodhur mbrëmjen e sotme në zonën e Fllakës, në Durrës, pranë kufirit me zonën e Shënavlashit, ku një 36-vjeçar është qëlluar me armë zjarri.

Sipas burimeve për Euronews Albania, autorët kanë qëlluar nga një automjet në lëvizje, tip “Ford”, duke goditur 36-vjeçari në krahun e majtë me pistoletë. Pas të shtënave, i plagosuri arriti të shkonte vetë në Komisariatin e Policisë për të kërkuar ndihmë dhe transport drejt spitalit.

Burime të sigurta bëjnë me dije se 36-vjeçari kishte qenë i plagosur edhe dy vite më parë në një atentat tjetër, që ngre dyshime për përplasje të vazhdueshme mes palëve.

Aktualisht, ai ndodhet në sallën e operacionit në Spitalin Rajonal të Durrësit, ndërsa forca të shumta policie janë të pranishme në spital dhe në vendin e ngjarjes.

Hetimet vazhdojnë për zbardhjen e plotë të ngjarjes dhe identifikimin e autorëve.

Njoftimi zyrtar i policisë:

Rreth orës 20:00, në zonën e Fllakës, dyshohet se për motive të dobëta është plagosur me armë zjarri shtetasi A. G., 36 vjeç, banues në Durrës, aktualisht jashtë rrezikut për jetën.

Shërbimet e Policisë dhe Grupi hetimor ndodhen në vendngjarje dhe vijojnë kontrollet dhe hetimet për identifikimin dhe kapjen e autorit, sqarimin dhe dokumentimin ligjor të rrethanave të ngjarjes.