Plagosje me armë në Shijak, autori arratiset. Policia jep detajet e para

Një plagosje me armë është regjistruar pasditen e kësaj të diele në Shijak. Policia bën me dije se ngjarja ka ndodhur rreth orës 17:30 në lagjen Lugina. Mësohet se pas një konflikti mes dy personash, situata ka agravuar në përdorimin e armës.

Si pasojë ka mbetur i plagosur në këmbë njëri prej personave të përfshirë në konflikt. Ai është transportuar në spital për të marrë ndihmë mjekësore dhe ndodhet jashtë rrezikut për jetën. Ndërkohë autori është arratisur dhe policia po punon për kapjen e tij.

“Shijak/Informacion paraprak Rreth orës 17:30, në lagjen Lugina, Shijak, dyshohet se, pas një konflikti për motive të dobëta ndërmjet shtetasve B. G. dhe E. B., ka mbetur i plagosur me armë zjarri në këmbë shtetasi B. G.

Shërbimet e Policisë kanë shkuar menjëherë në vendngjarje, kanë rrethuar zonën dhe vijojnë kontrollet intensive për lokalizimin dhe kapjen e shtetasit E. B., autorit të dyshuar të plagosjes.

Shtetasi B. G. është transportuar në spital për të marrë ndihmë mjekësore dhe ndodhet nën kujdesin e mjekëve, jashtë rrezikut për jetën.

Grupi hetimor, nën drejtimin e Prokurorisë, vijon veprimet për sqarimin dhe dokumentimin e plotë të rrethanave të ngjarjes”, njofton policia.