“Po armatosen”- Çollaku: Hapësira shqiptare kthehet në fortifikatë ndaj ndikimit rus

Deputeti i Partisë Demokratike, Kreshnik Çollaku, është shprehur se Ballkani po kthehet në një lloj fortifikimi kundër influencës ruse.

Komentet Çollaku i bëri në një lidhje për Euronews Albania, ku tha se vizita e sekretarit amerikan të Shtetit, Anthony Blinken, armatimi i Shqipërisë e Kosovës dhe ndërtimi i bazës së NATO-s në Kuçovë janë tregues që Perëndimi po përgatitet për t’iu kundërpërgjigjur çdo lloj aventure të Vladimir Putinit.

Ai tha gjithashtu se vëmendja e Perëndimit është në armatimin dhe forcimin kryesisht të Shqipërisë dhe Kosovës.

“Këto janë çështje të natyrës strategjike e taktike. Janë deklarata taktike, por fakt është se për fatin e mirë edhe të rajonit tonë, Ballkani shikohet sot si një zonë e rrezikuar nga pikëpamja e sigurisë nga influencat ruse, por po ashtu kthehet në një fortifikatë të çdo lloj influence ruse për destabilizim.

Nuk ishte rastësore edhe vizita e Blinken, ndërtimi i bazës në Kuçovë, armatimi i Kosovës dhe Shqipërisë. Pra ka një kontekst sigurie në krejt Ballkanin Perëndimor, por kryesisht në hapsirën shqiptare, për t’ju përgjigjur çdo lloj aventure të Rusisë apo të aleates së saj në Ballkan, Serbisë”, tha Çollaku.

LEXONI GJITHASHTU:

• Samiti për Ukrainën dhe Ballkanin Perëndimor, rrugët që bllokohen për 2 ditë
• Analiza: Politikanët e mediat në Ballkan “përhapin dezinformata në favor të Rusisë”