Po ndiqeshin nga policia, 3 grabitës dhe 1 oficer vdesin pas përplasjes së makinave

Një oficer i Policisë Kombëtare të Spanjës dhe tre grabitës të dyshuar të një farmacie humbën jetën pasi automjetet e tyre u përplasën dhe shpërthyen në flakë në autostradën A-7 pranë Torremolinos, në orët e para të mëngjesit të sotëm.

Ngjarja tragjike ndodhi rreth orës 5:30 të mëngjesit në Malaga, pasi tre kriminelët po ndiqeshin nga policia lokale menjëherë pasi kishin thyer me makinën e tyre fasadën e një farmacie dhe më pas ishin futur për të vjedhur ilaçe dhe para të gatshme.

Ata u vunë në ndjekje nga efektivët ndërsa po iknin drejt lindjes nga qendra e qytetit Malaga, por ndjekja u bë fatale kur të dyshuarit nisën të ngisnin makinën në drejtim të kundërt përgjatë autostradës bregdetare të ngarkuar A-7.

Automjeti i grabitësve u përplas me një makinë policie që vinte përballë, duke shkaktuar që të dy automjetet të shpërthenin në flakë nga përplasja e fortë.

Në mediat shqiptare aludohet se tre grabitësit që humbën jetën mund të jenë shqiptarë, por deri më tani policia spanjolle nuk ka konfirmuar këtë informacion dhe nuk ka publikuar emrat e viktimave.

Shërbimet e emergjencës nga tre stacione zjarrfikëse — Churriana, Carretera de Cadiz dhe Central Martiricos — u nisën shpejt për të shpëtuar personat e bllokuar nga rrënojat që digjeshin.

Zjarrfikësit arritën të nxirrnin tre persona nga një automjet, ndërsa oficerët e policisë lokale nxorën shoferin nga makina tjetër.

Megjithatë, të tre grabitësit dhe polici humbën jetën për shkak të plagëve të marra.

Në këtë grabitje të fundit, një operacion i Policisë Kombëtare i përgatitur për këtë rast i ndoqi grabitësit sapo u aktivizuan alarmet.

Grabitësit e dyshuar, duke drejtuar një Peugeot 5008 me motor 1,600cc, tentuan të iknin përgjatë autostradës A7 drejt Torremolinos.

Në një rrethrrotullim në dalje të qytetit, sulmuesit përplasën makinën e drejtuar nga një oficer i Policisë Kombëtare jashtë detyrës, i cili nuk ishte i vetëdijshëm për ngjarjet në atë moment, sipas burimeve policore.

Bazuar në disa imazhe të automjeteve, ato shpërthyen në flakë për shkak të përplasjes së rëndë.

Ky është incidenti më serioz i ndodhur në rrugët e Malagas në kohët e fundit, pas një aksidenti në gusht të vitit të kaluar ku katër persona vdiqën në një përplasje ballë për ballë në Casabermeja.

Aksidenti i kaluar ndodhi në një rrugë me dy drejtime dhe ndoshta shkaktoi një shpërqendrim, ndryshe nga ky rast ku kriminelët e dyshuar, duke ikur, i morën jetën një oficeri policie që po kthehej në shtëpi pas një nate pune.

LEXONI GJITHASHTU:

• Trafik droge Holandë-Spanjë drejt Finlandës, SPAK njoftim për 4 grupet shqiptare
• Vriten dy skocezë në një lokal në Spanjë, sulmi kur po luhej finalja e Champions