“Po shkatërrojnë Hamasin”, Blinken: Do të rifillojmë bisedimet për lirim të pengjeve

Sekretari amerikan i Shtetit, Antony Blinken, deklaroi të enjten se Izraeli e ka përmbushur synimin për “shkatërrimin e suksesshëm të Hamasit” dhe se bisedimet për një armëpushim dhe lirimin e pengjeve në Gazë do të rifillojnë në ditët në vijim.

Komentet e Blinken erdhën pas një sulmi izraelit në një shkollë në Gazën qendrore, ku qëndronin të zhvendosur, duke shkaktuar vdekjen e së paku 17 personave, përfshirë 13 fëmijë dhe tri gra, sipas zyrtarëve mjekësorë palestinezë. Ushtria izraelite tha se sulmi ishte në shënjestër të militantëve të Hamasit brenda shkollës, por nuk ofroi prova për këtë.

Blinken, i cili po zhvillon një turne në Lindjen e Mesme, theksoi se është e rëndësishme të përcaktohet nëse Hamasi është i gatshëm për t’u angazhuar në bisedime. Ai gjithashtu njoftoi se Shtetet e Bashkuara do të ndihmojnë palestinezët me 135 milionë dollarë dhe kërkoi nga Izraeli që të lejojë më shumë ndihma për territorin palestinez.

Sipas Ministrisë së Shëndetësisë në Gaza, më shumë se 42,000 palestinezë janë vrarë që nga sulmi i 7 tetorit të vitit të kaluar nga Hamasi, i cili ka shkaktuar një situatë humanitare të rëndë në rajon. Rreth 90 për qind e banorëve të Gazës, që numërojnë 2.3 milionë, janë zhvendosur nga shtëpitë e tyre.

LEXONI GJITHASHTU:

• Presidenti palestinez bën thirrje për përfundimin e luftës në Gaza
• Gaza| Izraeli akuzon gazetarët e rrjetit Al Jazeera si militantë palestinezë