Po zhduket fjala “Alo”, sjella e re e Gjeneratës Z po habit botën

Nëse keni telefonuar ndonjëherë një të ri të Gjeneratës Z dhe jeni pritur nga heshtja në vend të një “Alo”, nuk jeni vetëm.

Ky fenomen po bëhet gjithnjë e më i zakonshëm dhe po ngjall debat mes brezave në rrjetet sociale.

Gjenerata Z, të lindurit mes viteve 1997 dhe 2012, kanë zhvilluar një sjellje të re ndaj telefonatave. Shumë prej tyre nuk përshëndesin kur hapin telefonin, por presin që iniciativën ta marrë personi që ka telefonuar. Kjo praktikë, e cila për brezat më të vjetër mund të tingëllojë si mungesë respekti apo edukate, për “zoomerët” është një masë sigurie ndaj mashtrimeve në rritje dhe teknologjisë që mund të abuzojë me zërin e tyre.

Në platformën “X” (ish-Twitter), një përdorues u bë viral kur vuri në dukje këtë ndryshim të qasjes nga të rinjtë. Komentet që pasuan hapën një diskutim më të gjerë për kulturën e re të komunikimit përmes telefonit.

Eksperti i sigurisë kibernetike Marijus Briedis nga NordVPN, e mbështet këtë sjellje duke theksuar se është më e sigurt të përdoret një ton neutral, madje emocionalisht “gri”. Ai paralajmëron për rreziqet e regjistrimit të zërit dhe përdorimit të tij nga mashtrues, madje edhe përmes inteligjencës artificiale.

Nga ana tjetër, shumë përfaqësues të brezave më të vjetër nuk pajtohen me këtë mënyrë komunikimi dhe e konsiderojnë të ftohtë dhe të pasjellshme.

Ndërkohë, duket se “alo”-ja klasike është në rënie, teksa një brez i tërë po përqafon heshtjen si formën më të re të përshëndetjes në telefon.

LEXONI GJITHASHTU: 

• Rregulli i ri për të hyrë në BE, prek dhe qytetarët shqiptarë

• Arrest me burg për Ilrjan Selmanin, mohon në gjykatë vrasjen e 52-vjeçares