Pogradec, italianët mbështesin fermerët me pajisje moderne dhe ekspertizë europiane

Në Pogradec u prezantua një nismë e rëndësishme për ruajtjen e varietetit të rrallë të rrushit “Serina e Bardhë”, një pasuri e zonës që rrezikonte të zhdukej. Fermerët e Grabovicës tashmë janë bashkuar në një kooperativë, duke krijuar mundësi të reja për prodhim dhe zhvillim ekonomik.

Prodhuesi i verës, Ersol Caco u shpreh se ky bashkim është kryer për të investuar në vreshta të rinj dhe për të pasur një mënyrë tjetër taksimi.

“Qëllimi kryesor është identifikimi i produkteve tipike lokale. Në vreshtarinë e zonës ka varietete shqiptare me risk të humbjes, si Serina e Bardhë, Gems dhe Muskat Kanellë.

Ne si fermerë jemi bashkuar ligjërisht për të investuar në vreshta të rinj dhe për të pasur një mënyrë tjetër taksimi. Aktualisht jemi 7 fermerë dhe synojmë të përfshijmë të gjithë ata që merren me vreshtari”, tha ai.

Në ceremoninë e zhvilluar në Grabovicë u dorëzuan edhe makineri moderne bujqësore për inkubatorin e Pogradecit, duke krijuar kushte më të mira pune, rritje të prodhimit dhe mbështetje konkrete për fermerët e zonës.

Kryetari i Bashkisë Pogradec, Ilir Xhakolli u shpreh se ky bashkëpunim sjell përfitime për palët si dhe lehtësi për të vijuar këtë aktivitet.

“Më në fund u kuptua se duke qenë bashkë përfitimet janë më të mëdha. Bashkimi sjell lehtësira, qoftë për taksat, qoftë për aksesin në skema mbështetëse. Edhe farërat, edhe pesticidet merren më lirë dhe më cilësore kur punoni të bashkuar”, tha ai.

Paolo Viviani, përfaqësues i palës italiane, theksoi potencialin e produkteve tradicionale shqiptare në tregun europian.

“Produkti tradicional luan një rol të rëndësishëm në promovimin e aktiviteteve të fermerëve shqiptarë. Ne kemi identifikuar produktet që lidhen ngushtësisht me zonat e tyre dhe ato kanë vend të sigurt në tregun kombëtar.

Kur arrijnë vlerë të veçantë ose sasi të mjaftueshme, hapet mundësia e tregut ndërkombëtar. Me ecjen që po bën Shqipëria drejt BE, tregu europian është një mundësi e shkëlqyer për këto produkte’, u shpreh Viviani.

Nëpërmjet kësaj nisme, fermerët e Pogradecit do të punojnë të bashkuar, do të përfitojnë teknologji, trajnime dhe standarde të reja prodhimi, duke forcuar vlerën e produkteve vendase dhe identitetin e tyre rural.

LEXONI GJITHASHTU:

• Gjirokastër, kostumet popullore simbolika e festave për fëmijët dhe të rinjtë
• Protestat në Greqi, incidente në bllokadat e fermerëve me policinë