Polici i plagosur pas ndërhyrjes në sherr, Balla: Kushdo guxon, do ndëshkohet rëndë

Kushdo që guxon të ngrejë dorë mbi një efektiv policie do të ndëshkohet rëndë tha ministri i Brendshëm, Taulant Balla.

Ishte kjo deklarata që erdhi pasi polici 25-vjeçar, Redin Çaushaj, jashtë orarit të shërbimit, ndërhyri për të neutralizuar një sherr dhe përfundoi i plagosur me thikë.

“Prej mbrëmë, pak para mesnate, një nga djemtë e rinj dhe të përkushtuar të Policisë së Komisariatit Himarë, Redin Çaushaj, po lufton për jetën në Reanimacionin e Spitalit të Vlorës. Mjekët dhe infermieret e këtij spitali kanë bërë më të mirën dhe gjendja shëndetësore e Redianit, edhe pse vazhdon e rëndë, po shfaq përmirësime dhe paraqitet e stabilizuar në parametrat jetikë për momentin,”- bëri me dije Balla.

Ministri u shpreh se pret  që pas arrestimit të autorit, Prokuroria Vlorë të bëjë një hetim të plotë, të pavarur dhe të  japë një ndëshkim të ashpër për fajtorin.

“Kushdo që guxon të ngrejë dorë kundër një punonjësi policie duhet ta dijë mirë se po kryen një krim të rëndë kundër shtetit. Do të flas në një moment të dytë sot për këtë çështje,” – shtoi Balla.

LEXONI GJITHASHTU:

• Balla “porosi” Shqiponjave: Policia nuk mund të jetë e fortë, po është arrogante
• Ndërtimet pa leje, Balla vizitë blic në Sarandë: Të ruajmë “Maldivet e Europës”