Policia e Tiranës ka ndërmarrë të mërkurën një aksion për goditjen e veprimtarisë së paligjshme të vendosjes së basteve sportive online.
Uniformat blu kanë kryer kontrolle në disa ambiente në kryeqytet të cilat dyshoheshin se përdoreshin për vendosjen e skedinave.
Gjatë kontrolleve të ushtruara në zona të ndryshme të Tiranës është bërë kapja dhe arrestimi në flagrancë i 6 shtetasve të implikuar në këtë veprimtari kriminale.
Në pranga përfunduan shtetasit: D. L., 32 vjeç, S. N., 48 vjeç, T. S., 34 vjeç, R. Z., 18 vjeç, G. P., 24 vjeç, dhe D. K. 34 vjeç, të gjithë banues në Tiranë.
Gjithashtu janë shpallur në kërkim shtetasit B. K., dhe E. P. dhe po punohet për kapjen e tyre.
Policia bën me dije se 6 aparatet celulare të këtyre shtetasve u sekuestruan në cilësinë e provës materiale.
Materialet i kaluan prokurorisë së tiranës për veprime të mëtejshme.
