Policia çon në SPAK Xhelal Mziun dhe nipin i tij: Goditën një person me grushte

Policia e Dibrës ka referuar në SPAK materialet në ngarkim të deputetit të PD-së Xhelal Mziu dhe nipit të tij 36-vjeçar pasi akuzohen se kanë goditur me grushte një qytetar pas një takimi elektoral në fshatin Ostren.

Policia thotë se dy të akuzuarit, xhaxha dhe nip, banues në Tiranë, dyshohet se rreth orës 13:00 të datës 24 prill 2025, kanë goditur me grushte 33-vjeçarin Kalosh Murra, banues në Shupenzë, në ambientet e jashtme të njësisë administrative Ostren, pas përfundimit të një aktiviteti elektoral të Partisë Demokratike.

Sipas burime 33-vjeçari Kalosh Murra është një zyrtar vendor në fshatin Ostren ndërsa incidenti ka ndodhur para ambienteve të kësaj njësie.

Njoftimi i policisë

“Specialistët për Hetimin e Krimeve të Komisariatit të Policisë Bulqizë referuan materialet në SPAK, për veprën penale “Kanosja apo dhunimi ndaj pjesëmarrësve në zgjedhje”, për shtetasit Xh. M., 58 vjeç dhe E. M., 36 vjeç, xhaxha e nip, të dy banues në Tiranë, sepse rreth orës 13:00 të datës 24.04.2025, pas një takimi elektoral të zhvilluar nga subjekti politik “Partia Demokratike”, në fshatin Ostren, dyshohet se kanë goditur me grushte, shtetasin K. M., 33 vjeç, banues në Shupenzë, në ambientet e jashtme të njësisë administrative Ostren”, thuhet në njoftimin e policisë.

LEXONI GJITHASHTU:

• Akuzat se dhunoi qytetarin me grushte, reagon Mziu: Ngjarja është totalisht ndryshe
• “Mziu shtyu Ekonomin”- Përplasjet në Kuvend, çfarë ndodhi jashtë kamerave
• Incidenti në Dibër, reagon Berisha: Provokim i ulët i Blendi Klosit