Policia e Serbisë shpërndan bllokadat gjatë natës në Novi Sad, 79 të shoqëruar

Gjatë natës mes 2 dhe 3 korrikut, policia serbe ndërhyri në disa lokacione në Beograd dhe Novi Sad, ku qytetarë dhe studentë kishin bllokuar rrugët. Ministria e Punëve të Brendshme (MPB) njoftoi në mëngjes se të gjitha bllokadat janë larguar dhe rrugët janë të kalueshme.

Sipas MPB-së, gjatë ndërhyrjes janë kontrolluar gjithsej 1,297 persona, ndërsa 79 janë shoqëruar në stacione policore, prej të cilëve 72 për kundërvajtje dhe shtatë për dyshim të shkeljes së Kodit Penal.

Policia raportoi se në disa vende, përfshirë Beograd, Nish, Novi Pazar dhe Novi Sad, kanë ndodhur incidente të izoluara, ku disa persona u arrestuan për prishje të rendit dhe kryerje të veprave penale. Gjatë bllokadave janë lënduar katër policë dhe është dëmtuar një veturë zyrtare e policisë.

Autoritetet u bënë thirrje qytetarëve të përmbahen nga veprimet e paligjshme dhe të mos bllokojnë rrugët, për të shmangur rrezikun ndaj sigurisë së tyre dhe të të tjerëve.

LEXONI GJITHASHTU:

• Makina doli nga rruga e shpërtheu, si humbi jetën ylli i Liverpool bashkë me vëllanë
• Një armëpushim i mundshëm? Udhëheqësit e Hamasit urdhërohen të dorëzojnë armët