Policia kap rreth 14 kg kokainë në kufirin Shqipëri-Mal i Zi

Policia i kapi sot 14.3 kg kokainë një 42-vjeçari, që po mundohej ta transportonte me makinë jashtë Shqipërisë.

Droga u kap e fshehur në pjesën e kroskotit të veturës, tip “Mercedes-Benz”, me të cilën 42-vjeçari B.R po mundohej të kalonte kufirin Shqipëri-Mal i Zi në Muriqan.

Pas konstatimit të saj makina është dërguar në portin e Durrësit për kontroll më të specializuar.

Në një njoftim për shtyp policia tha se B.R u arrestua dhe se ai ishte rezident në Durrës.

Kjo është ngarkesa e tetë e madhe me kokainë që pikaset nga autoritetet shqiptare brenda këtij viti.

Në qershor në kufirin me Malin e Zi u kapën 324 kg kokainë fshehur në një kamion që kishte kaluar tranzit në Shqipëri nga Maqedonia e Veriut me destinacion Italinë.

Në muajin maj rreth 400 kg kokainë u kapën në Kosovë pasi kishin kaluar nga Shqipëria ndërsa në muajin prill në portin e Durrësit u kapën dy ngarkesa 143 dhe 49 kg.

Gjatë korrikut kompanisë “Alba Exoti Fruit” iu kapën në tre ngarkesa të ndryshme mbi 25 kg kokainë.

Në shumicën e këtyre e rasteve autoritetet kanë përfunduar operacionet me arrestimin e drejtuesve të makinave, apo dhe administratorëve të kompanive porositëse të ngarkesës parësore.

LEXONI GJITHASHTU:

• Policia kap sërish kokainë në ngarkesat e kompanisë “Alba Exotic Fruit”
• SPAK përfshihet në hetimet për katër sasitë e drogës kapur ngarkesave të “Alba Exotic Fruit”
• Një shqiptar pas grupit kolumbian që dërgonte kokainë në SHBA përmes fluturimeve “charter”