Policia zbardh aksidentin: 2 të vdekur dhe 1 i plagosur; kamioni me pompë betoni u përplas me një automjet dhe ra nga ura

Policia e Tiranës ka dalë me një njoftim zyrtar lidhur me aksidentin e rëndë të ndodhur pasditen e kësaj të mërkure në Unazën e Madhe të kryeqytetit.

Sipas policisë, rreth orës 16:20, në një nga rrethrrotullimet e Unazës së Madhe, një kamion (pompë betoni) është përplasur me një automjet.

Si pasojë e përplasjes, kamioni ka çarë barrierat metalike mbrojtëse të rrethrrotullimit dhe ka rënë në nivelin e poshtëm të aksit rrugor që të çon drejt Elbasanit.

Për pasojë, njëri prej personave që udhëtonte në kamionin (pompë betoni) dyshohet se ka humbur jetën në vendngjarje, ndërsa personi tjetër është transportuar në spital në gjendje të rëndë shëndetësore, por nuk ka arritur t’u mbijetojë plagëve të marra dhe ka ndërruar jetë në spital.

Policia bën me dije se dy personat që ndodheshin në kamion, të cilët humbën jetën si pasojë e aksidentit, janë ende të paidentifikuar. Ndërkohë, drejtuesi i automjetit tjetër, shtetasi R. N., rreth 28 vjeç, është dërguar në spital dhe ndodhet jashtë rrezikut për jetën.

Në vendngjarje ndodhen shërbimet e Policisë dhe grupi hetimor, të cilët po punojnë për zbardhjen e plotë të rrethanave dhe shkakut të aksidentit.