“Polifonia shqiptare po tjetërsohet”, ekspertët kërkojnë ditë të veçantë në kalendar

Polifonia shqiptare e cila është vlerësuar si kryevepër e pasurisë së njerëzimit dhe që mbrohet nga UNESCO është kthyer në temë diskutimi nga ekspertët.

Me rastin e 30-vjetorit të krijimit të saj, Shoqata Kulturore-Artistike “Bylis”, në bashkëpunim me Ansamblin e Këngëve dhe Valleve Popullore organizoi një aktivitet kulturor, ku specialistët ngritën shqetësimin për faktin se polifonia shqiptare është e regjistruar  ‘iso-polifoni’, dhe sipas tyre kjo është e gabuar.

“Gjithë këto aktivitete janë shoqëruar me kritika shkencore ndaj prirjeve joshkencore e jokombëtare, për të degraduar vlerat e isopolifonisë në këtë tranzicion të zgjatur me prurjet turbo- folk e tallava, e deri te ndryshimi i identitetit nga polifoni shqiptare në isopolifoni, me qëllimin e keq për të marrë autorësinë dhe për të shkelur rëndë mbi etnicitetin e kësaj kulture frymore dhe shpirtërore shqiptare. Nëse nuk do të luftojmë fort, kjo pasuri do të mbetet e prejardhur nga sirenat e kishës bizantine greke, gjë që e ardhmja nuk do të na e falë kurrë”, tha Yzeir Llanaj kryetar i shoqatës “Polifonia shqiptare”.

Muzikanti Zhani Ciko, i cili është edhe nënkryetar i shoqatës “Polifonia shqiptare” dhe drejtor artistik i Festivalit “Bylis Polifonia” propozoi që të caktohet një ditë, që të jetë dita e polifonisë.

“Duhet më shumë përkrahje edhe nga organet e tjera. Duhet të propozojmë që për polifoninë shqiptare të caktohet një ditë, që të jetë dita e polifonisë. Nismën mund ta marrë dhe Ansambli dhe ky takim mund të bëhet iniciues i procedurave, për të pasur në kalendarin tonë ditën e polifonisë shqiptare.”, shprehet Ciko.

Në mjediset e Teatrit Kombëtar të Operas dhe Baletit u promovua edhe Simpoziumi i Nëntë Shkencor, i cili trajton dhe ruan pasuritë e trashëgimisë sonë kulturore. Po ashtu, u prezantua dhe u diskutua për Festivalin Ndërkombëtar “Bylis Polifonia”, një ngjarje që synon të mbledhë rreth vetes artistë dhe grupe polifonike nga mbarë vendi dhe më gjerë.

Në aktivitet u ndanë edhe disa vlerësime për figura që kanë kontribuar në ruajtjen, studimin dhe përçimin e polifonisë shqiptare.

LEXONI GJITHASHTU:

• Kisha Katolike njofton kremtimin e meshës për Papa Françeskun në Tiranë
• “Mbrojeni flamurin, është thesari juaj”, kleriku rrëfen fjalët e Papa Françeskut