Poloni: Ministri i Drejtësisë gjobitet me 350 euro për mosdhënie përparësie këmbësorit

Ministri i Drejtësisë i Polonisë u gjobit për mosdhënie përparësie një këmbësori ndërsa jepte një intervistë dhe drejtonte makinën e tij, vetëm disa ditë para se të njoftonte një kuadër më të rreptë për trajtimin e shkeljeve të trafikut.

Në pamjet e kapura nga objektivi gjatë intervistës së tij me një vloger polak, Waldemar Zurek, me sa duket i shpërqendruar, duket se nuk i jep përparësi një gruaje që përpiqet të kalojë rrugën në një vendkalim për këmbësorë.

“Pas analizimit të informacionit të mbledhur në kontekstin e procedurës përkatëse në lidhje me një shkelje të rregullave të trafikut, oficerët e policisë arritën në përfundimin se ishte kryer një shkelje”, njoftoi sot policia e Krakovës (jug) në llogarinë e saj në Twitter.

Ai shtoi se “Ministri Waldemar Zurek pranoi të heqë dorë nga imuniteti i tij dhe të paguajë gjobën e vendosur”, shuma e së cilës nuk është përcaktuar.

Ministri, i cili mban edhe pozicionin e Prokurorit të Përgjithshëm, përballet me një gjobë prej 1,500 zlotys (350 euro) dhe zbritjen e 15 pikëve nga një total prej 20 në patentën e tij të drejtimit.

“Askush nuk është imun. Më shqetëson edhe mua”, pranoi ai në deklaratat për agjencinë polake të lajmeve PAP.