Kryeministri i Polonisë, Donald Tusk, deklaroi të premten se qeveria e tij po punon për një plan që do të përgatisë një program stërvitjeje ushtarake në shkallë të gjerë për çdo mashkull të rritur. Ky vendim sipas Tusk vjen në përgjigje të ndryshimeve në situatën e sigurisë në Evropë.
Duke folur para Sejmit, dhomës së ulët të parlamentit polak, Tusk theksoi se ky program synon krijimin e një force rezervë të aftë për t’u përballur me kërcënimet e mundshme.
Polonia, e cila ndodhet në krahun lindor të NATO-s, është thellësisht e shqetësuar për luftën në Ukrainë dhe pasojat që mund të ketë një disfatë e Kievit.
Në Varshavë ekziston frika se, nëse Rusia arrin objektivat e saj në Ukrainë, ajo mund të shtrijë ambiciet e saj imperialiste ndaj vendeve si Polonia, të cilën e ka kontrolluar në shekullin e 19-të dhe gjatë Luftës së Ftohtë.
Shqetësimet janë rritur edhe më shumë pas ndryshimit të qasjes së presidentit amerikan Donald Trump, i cili ka lëvizur nga një pozicion mbështetës për Ukrainën në një qëndrim më të rezervuar, duke kufizuar ndihmën ushtarake dhe inteligjencën, si dhe duke dhënë sinjale mbështetëse ndaj qëndrimit të Rusisë.
LEXONI GJITHASHTU:
- Ukraina ka qenë fuqia e tretë bërthamore në botë, si hoqi dorë pas garancive të SHBA
- Lavrov: Retorika e Macron kërcënim për Rusinë, dëshiron të njëjtën gjë si Hitleri
- Macron: Rusia kërcënon gjithë Evropën, duhet të jemi të përgatitur nëse SHBA nuk…
