Pranohet gjykimi i shkurtuar për 16 nga 19 të akuzuarit e inceneratorit të Fierit

Gjykata e Posaçme Kundër Krimit të Organizuar dhe Korrupsionit ka pranuar gjykimin e shkurtuar për 16 nga 19 të pandehurit e inceneratorit të Fierit.

Gjykimi i shkurtuar është pranuar dhe për ish-ministrin Lefter Koka, ish-deputetin Alqi Bllako, biznesmentin Klodian Zoto, zyrtarët dhe ish-zyrtarët e tjerë të dyshuar për korrupsion, shpërdorim detyre dhe pastrim parash.

Çështja është veçuar për 3 të pandehurit, Etleva Kondi, Arenc Murtezani dhe Guzeppe Ceffalione, të cilët do gjykohen me gjykim të zakonshëm. Seanca e radhës, ku prokuroria pritet të japë edhe pretencën do mbahet më datë 12 qershor ora 10:00. Më herët, SPAK ka rrëzuar kërkesën e bërë nga të pandehurit Arben Dervishaj dhe Regan Merdani, për shpalljen e çështjes së tyre si moskompetencë e këtij organi të drejtësisë. Këta të fundit për shkak të klasifikimit të veprave penale gjatë seancës paraprake, pretendojnë se këto vepra penale nuk janë kompetencë e SPAK.

Ata kërkuan shpalljen e moskompetencës dhe kalimin e akteve për zhvillimin e procesit zgjedhor në Gjykatën e Rrethit gjyqësor Tiranë të Juridiksionit të Përgjithshëm. Nga ana tjetër, mësohet se nuk u pranua kërkesa e një banke të nivelit për të qenë palë në proces. U rrëzua gjithashtu kërkesa për shpalljen e akteve të pavlefshme dhe veçimi i tyre nga i pandehuri Arenc Myrtezani. Dy javë më parë Prokuroria e Posaçme dha edhe pretencën për inceneratorin e Elbasanit. SPAK kërkoi 52 vite burg për 9 të pandehurit.  10 vite burg u kërkua për ish-ministrin e mjedisit Lefter Koka, i arrestuar për aferën  e inceneratorit të Elbasanit. Të njëjtin dënim SPAK kërkoi edhe për administratorët Klodian Zoto e Mirel Mërtiri dhe Nëse gjenden fajtorë do të vuajnë dënimin me 6 vite e 8 muaj burg për shkak se ndaj tyre është aplikuar  gjykimi i shkurtuar. Koka akuzohet për “Shpërdorim detyre”, “Korrupsion i zyrtarëve të lartë shtetërorë” e “Pastrim parash”.

Ndërsa për administratoren tjetër Stela Gugallja  prokuroria kërkoi dënimin përfundimtar me 4 vite e 8 muaj. Ajo  është ende në kërkim bashkë me Mërtirin e Zoton. Ndërsa për ish-sekretarin e Ministrisë së Mjedisit  Alqi Bllako, SPAK i kërkoi gjykatës dënimin me 4 vite burg me akuzën e shpërdorimit të detyrës dhe në fund dënimin  me 2 vite e  8 muaj burgim.  Edhe për anëtarët e Komisionit të Vlerësimit të Ofertave, Serafin Papa, Bardhyl Çabiri e Jonida Zeqo u kërkua dënimi me 4 vite burg dhe nëse gjenden fajtor dënimin me 2 vite e 8 muaj heqje lirie.