Viktoria Roshçina u zhduk në gusht të 2023-shit në një zonë të Ukrainës, aktualisht e pushtuar nga trupat ruse. U deshën 9 muaj që autoritetet ruse të konfirmonin se gazetarja ishte burgosur, pa dhënë asnjë arsye.

Këtë javë, babai i saj mori një letër të shkurtër nga Ministria e Mbrojtjes në Moskë, që e informonte se Viktoria kishte vdekur në moshën 27-vjeçare.

Në letër thuhej se trupi i saj do t’i kthehej familjes në një shkëmbim të organizuar nga Rusia dhe Ukraina për ushtarët e vrarë në fushën e betejës.

Data e vdekjes së saj rezulton 19 shtatori, por njoftimi i dërguar nga Kremlini nuk jep asnjë sqarim mbi motivet e ndarjes nga jeta të gazetares.

Këtë fundjavë, miqtë e saj u mblodhën për të kujtuar Viktorian në sheshin “Maidan”, në qendër të Kievit. Ata ngritën përpara një turme të vogël njerëzish një poster ku ajo shfaqej e qeshur.

Historitë e 27-vjeçares ishin një panoramë e jetës së ukrainasve nën pushtimin rus, që askush tjetër nuk i kishte siguruar më parë.

Raportimi nga zonat e pushtuara të Ukrainës ishte shumë i rrezikshëm, por kolegët e saj kujtojnë se sa e dëshpëruar ishte Viktoria që të shkonte atje, edhe pse më parë ishte burgosur për 10 ditë nga ushtarët rusë.

LEXONI GJITHASHTU:

• Scholz në Turqi, takim me Erdogan për Lindjen e Mesme, emigrantët dhe Ukrainën
• Katër viktima nga sulmet ruse në portin e Ukrainës, mes tyre një adoleshente