Presidenti i Këshillit Evropian: Vendimi i Trump për të mos vendosur tarifa të reja ndaj BE-së është pozitiv

Presidenti i Këshillit Evropian, Antonio Costa ka folur lidhur me vendimin e presidentit amerikan, Donald Trump për të mos vendosur tarifa shtesë ndaj vendeve evropiane të cilat janë kundër aneksimit të Groenlandës. Costa ashtu si Bashkimi Evropian përshëndeti vendimin e presidentit Trump.

Sipas tij vendosja e tarifave të reja do të ishte e papajtueshme me marrëveshjen tregtare. Më tej Costa theksoi se tani duhet të përqendrohen në zbatimin e marrëveshjes midis dy palëve.

“Njoftimi se nuk do të ketë tarifa të reja amerikane ndaj Evropës është pozitiv. Vendosja e tarifave të reja do të ishte e papajtueshme me marrëveshjen tregtare BE-SHBA”, tha Costa për shtypin pas një samiti të 27 vendeve të dedikuara për marrëdhëniet transatlantike.