Presidenti izraelit: E nevojshme që forcat tona ushtarake të qëndrojnë në Gaza

Presidenti i Izraelit, Isaac Herzog, është shprehur se është e nevojshme që forcat izraelite të qëndrojnë në Gaza, pas përfundimit të ofensivës ushtarake.

Sipas mediave të huaja, komentet Herzog i bëri përmes një interviste në Financial Times, ku tha se kjo është e nevojshme për të parandaluar rishfaqjen e Hamasit pas luftës.

Herzog tha se Izraeli “nuk mund të lërë vakum” në rajon dhe qeveria ka diskutuar idetë se si do të funksionojë enklava e rrethuar në të ardhmen.

“Nëse tërhiqemi, atëherë kush do ta marrë përsipër? Duhet të mendojmë se cili do të jetë mekanizmi. Ka shumë ide që hidhen në ajër,” tha ai.

“Askush nuk do të dëshirojë ta kthejë këtë vend, Gazën, në një bazë terroriste”, shtoi ai.

Herzog tha se ai supozoi se “fqinjët në rajon” të Izraelit dhe SHBA do të kishin njëfarë përfshirje në rendin e pas konfliktit në Gaza.

Komentet e tij erdhën pasi presidenti amerikan Joe Biden paralajmëroi se do të ishte një “gabim i madh” pushtimi i Gazës.

Ai tha se ia kishte bërë të qartë kryeministrit izraelit Benjamin Netanyahu se zgjidhja me dy shtete do të ishte mënyra e vetme për të zgjidhur konfliktin.

Autoriteti Palestinez, i cili ushtron vetëqeverisje të kufizuar në pjesë të Bregut Perëndimor të pushtuar nga Izraeli, ka argumentuar se Gaza, ku Hamasi ka sunduar që nga viti 2007, është një pjesë integrale e asaj që parashikon për një shtet të ardhshëm palestinez.

Izraeli është zotuar të shkatërrojë Hamasin, por nuk ka paraqitur një plan për të përcaktuar se kush do ta qeveriste Gazën pas luftës.

Netanyahu ka thënë se Izraeli do të duhet të mbajë përgjegjësinë e përgjithshme të sigurisë në Gaza për një periudhë të pacaktuar.

LEXONI GJITHASHTU:

• Lufta në Gaza/ Izraeli: Kemi hapur korridor humanitar për ata që duan të largohen
• SHBA sulmon objektivat iraniane në Siri