Presidenti, Ilir Meta u ka bërë sërish thirrje qytetarëve që t’i bashkohen tubimit të 2 marsi në mbrojtje të Kushtetutës. Z. Meta në një postim në rrjetin social, Facebook, shprehet se, kur institucionet e një vendi bien, ngrihet populli.
“Të dashur qytetarë, zgjohuni dhe ngrihuni se këtu institucionet kanë rënë përtokë. Ngrihuni për të rivendosur sovranitetin tuaj të nëpërkëmbur përmes rivendosjes së rendit kushtetues, demokratik dhe llogaridhënës”, shprehet z. Meta.
Presidenti ka akuzuar, kreun e Këshillit të Emërimeve në Drejtësi, Ardian Dvorani se, po i merr kompetencat Kreut të Shtetit në mënyrë që mazhoranca të kapë Gjykatën Kushtetuese.
“Dvorani që s’ka asnjë kompetencë tjetër veç të qenit korrier i vendimeve kolegjiale të KED, përse nuk i nisi të katër vendimet njëherazi edhe Presidentit edhe Kuvendit në një ditë siç vendosi KED? Kush i tha këtij t’ia niste Presidentit të dy vakancat njëherazi dhe Kuvendit t’ia çonte me kokën e tij 6 ditë më vonë?”, thotë Presidenti.
Z. Meta ka sulmuar dhe Arta Vorpsin, e cila është kthyer dhe në mollë sherri mes Presidentit dhe mazhorancës, duke e cilësuar “ngelëse të Magjistraturës”. Vorpsi u emërua automatikisht anëtare e Gjykatës Kushtetuese, pasi renditej e para në garën e vakancës.
“Po kështu edhe atë ngelësen e provimit të Magjistraturës, që Dvorani e nxori të parën në të katër vakancat, si mund ta lenë në baltë, kur ajo për hir të Partisë u betua në Lanë. Dhe kuptohet që kur Gjykata Kushtetuese të mbushet me këta, mos kini asnjë dyshim se Etilda do mbajë një fjalim plot “Etikë” e madje do i dalin dhe lot gëzimi nga kontributi i saj për realizimin e kryeperlës së Ramaformës”, përfundon z. Meta.
