Prishtina merr zyrat në veri, Bislimi: Kryetarët do të vijojnë mandatin e tyre

Zyrtarët e qeverisë së Kosovës kanë reaguar pasi policia mori në kontroll godinat e komunave në veri të vendit. Ministri i Brendshëm, Xhelal Sveçla përgëzoi efektivët për punën profesionale që bën në përballjen me grupet kriminale.

“Pas ceremonive të djeshme të betimit të Kryetarëve të komunave veriore, kryetarët e komunave Zveçan, Zubin Potok dhe Leposaviq sot janë vendosur në zyrat e tyre në objektet komunale. Ata do të vazhdojnë mandatin e tyre duke qenë në shërbim të të gjithë qytetarëve pa dallim. Përgëzoj Policinë e Kosovës për profesionalizmin e treguar në ballafaqimin me grupe të organizuara kriminale, që kishin për qëllim pengimin e këtij procesi. 5 pjesëtarë të policisë janë lënduar nga sulmet e këtyre grupeve por që fatmirësisht lëndimet janë të lehta, ata ndihen mirë dhe janë në detyrë”, shkruan Sveçla.

Edhe zëvendëskryeministri Besnik Bislimi, i cili është njëherësh kryenegociator për dialogun me Serbinë, ka reaguar për incidentet.

“Si kryetarё tё komunave, ata mund tё ushtrojnё pёrgjegjёsitё e tyre vetёm nga ndёrtesat e komunёs. Tё ardhur me votё, mund edhe tё rrёzohen me votё. Tё pёrzgjedhurit e qytetarёve si rregull rrallёherё gёzojnё mbёshtetjen e secilit qytetar. Por kjo nuk nёnkupton qё qytetarёt e pakёnaqur mund tё bllokojnё shkuarjen e tё pёrzgjedhurve nё vendet e tyre tё punёs.

Njё praktikё e tillё do tё çonte shumё lehtё nё situata absurde ku asnjё kryetar, nё asnjё komunё nuk do tё mund tё ushtronte detyrat e marra”, shprehet Bislimi.

LEXONI GJITHASHTU:

• VIDEO| Eksperti i sigurisë: Krimineli po qëllon efektivët e Kosovës
• Të shtëna dhe gaz lotsjellës në Veri, vjen reagimi i parë nga qeveria e Kosovës