Pritë e breshëri automatiku sapo la fëmijët në shkollë, detaje nga atentati në Lezhë

Të tjera detaje kanë dalë nga atentati i ndodhur mëngjesin e sotëm ndaj 54-vjeçarit Agron Puka në fshatin Rrile të Lezhës.

Sipas burimeve për Euronews Albania, bëhet me dije se autorët i zunë pritë dhe sulmuan me breshëri automatiku Agron Pukën, sapo ai kishte dërguar fëmijët e tij në shkollë me makinë.

Ai ka marrë plagë në trup dhe ndodhet në spital nën kujdesin e mjekëve.

Ngjarja ka ndodhur pranë dyerve të shkollës së Rriles, ku janë traumatizuar edhe nxënësit e shumtë që ndodheshin në vendngjarje.

Njoftimi i Policisë:

Rreth orës 08:00, në fshatin Rrilë, shtetasi A. P., 54 vjeç, banues në fshatin Rrilë, duke lëvizur me automjet, është plagosur me armë zjarri nga 1 person ende i paidentifikuar. 54-vjeçari është transportuar në spitalin rajonal të Lezhës, ku është në kujdesin e mjekëve (aktualisht jashtë rrezikut për jetën).

Shërbimet e Policisë, me marrjen e njoftimin, kanë shkuar menjëherë ne vendngjarje, është rrethuar zona dhe janë ngritur pika kontrolli.

Njëkohësisht, në ndihmë të Policisë vendore, janë nisur Forcat Kombëtare të Sigurisë të Njësisë Shkodër. Grupi hetimor, në drejtimin e Prokurorisë, vijon punën për sqarimin e rrethanave të ngjarjes dhe për identifikimin dhe kapjen e autorit.

LEXONI GJITHASHTU:

• Të shtëna me armë zjarri në Lezhë, një i plagosur
• Falsifikoi e tjetërsoi pronat në Lezhë, ekstradohet nga Italia i dënuari