Pro bashkimit me Rusinë, Putin shpall të premten vendimin për referendumet

Asnjë surprizë në referendumet e organizuara nga Rusia, e cila synon të aneksojë disa nga territoret në Ukrainë.

Sipas auroriteteve rajonale të mbështetura nga Moska, më shumë se 90% e banorëve në Donetsk, Luhansk, Zaporizhia dhe Kherson kanë votuar pro bashkimit me Rusinë.

Në përpjekje për t’i dhënë legjitimitet të mëtejshëm këtyre referendumeve, qeveria ruse ka bërë që të votojnë edhe ukrainasit e zhvendosur, të cilët, vullnetarisht ose jo, ndodhen në Rusi.

‘“Shpëtimi i njerëzve nga territoret ku po zhvillohet ky referendum është në fokusin parësor të vëmendjes së shoqërisë dhe vendit tonë”, u shpreh nga Sochi presidenti rus, Vladimir Putin.

Por “shpëtimi” i premtuar nga presidenti rus po kumbon në veshët e komunitetit ndërkombëtar, duke filluar nga qeveria ukrainase.

“Këto veprime, ky vendim i Putinit, nuk do të kenë asnjë ndikim në politikën, diplomacinë dhe veprimet e Ukrainës në fushën e betejës”, tha Ministri i jashtëm i Ukrainës, Kuleba.

Pjesa më e madhe e komunitetit ndërkombëtar ka njoftuar tashmë se nuk do të njohë rezultatin e referendumit. Brukseli shkoi më tej dhe tha se “do të ketë sanksione për të gjithë njerëzit që marrin pjesë në referendumet ilegale, të paligjshme”.

Territoret e pushtuara ushtarakisht nga Rusia përbëjnë 20% të sipërfaqes së Ukrainës. Është e mirëqenë se shpallja e aneksimit do të bëhet brenda pak ditësh, ndoshta pikërisht këtë të premte.

Në këtë kontekst, ish-presidenti rus Dmitri Medvedev ka përdorur edhe një herë kërcënimin bërthamor, nëse është e nevojshme për të mbrojtur integritetin territorial të Rusisë.

LEXONI GJITHASHTU

• Pse referendumi i sotëm rrezikon ‘fillimin e fundit të luftës’ në Ukrainë?
• Çfarë është BRICS – dhe rendi i ri botëror që ai propozon?
• Në ndihmë të Europës, kundër SHBA-së – cili është plani i Arabisë Saudite?