Procedohet në gjendje të lirë 38-vjeçari që dhunoi djalin e ish-deputetit

Një 38-vjeçar është proceduar në gjendje të lirë nga policia, pasi dyshohet se në bashkëpunim me persona të tjerë ka dhunuar Krist Fufin, djalin e ish-deputetit të Partisë Demokratike, Mhill Fufi.

Sipas njoftimit zyrtar, shtetasi Kliton Sulçe, ka goditur me grushte dhe ka kërcënuar 19-vjeçarin, i cili aktualisht ndodhet nën kujdesin e mjekëve në spital.

Ndërkohë, po vijon puna për identifikimin dhe kapjen e personave të tjerë të cilët dyshohet se janë përfshirë në këtë ngjarje.

“Specialistët për Hetimin e Krimeve të Komisariatit të Policisë Nr. 1 referuan materialet në Prokurori, ku nisi procedimi në gjendje të lirë për shtetasin K. S., 38 vjeç, pasi mbrëmjen e djeshme, në një rezidencë në Farkë, dyshohet se ka goditur me grushte dhe ka kanosur 19-vjeçarin K. F., i cili ndodhet në spital nën kujdesin e mjekëve. Vijon puna për identifikimin dhe kapjen e shtetasve të tjerë të përfshirë në konflikt,” thuhej në njoftimin e policisë.

Si ndodhi ngjarja?

Disa persona të paidentifikuar kanë mbërritur me automjet në lokalin ku ndodhej Krist Fufi.
Pasi kanë marrë nga bagazhi shkopinj dhe sende të forta, ata kanë hyrë brenda lokalit dhe kanë dhunuar 19-vjeçarin.

Si pasojë e sulmit, Krist Fufi ka pësuar dëmtime në kokë dhe trup dhe aktualisht po trajtohet në spital.

Ende nuk dihen motivet e kësaj ngjarjeje.