Prodhimi dhe shitjet ranë 16.6%, INSTAT: Bizneset e këpucëve më të prekurat

Industria prodhuese vijon të jetë në krizë shkak të vështirësive të shumta të cilat konkretizohen nga rënia e volumit të prodhimit dhe të shitjeve.

Të dhënat dëshmohen nga shifrat e INSTAT, të cilat tregojnë se krahasimisht me tre mujorin e vitit 2022, indeksi i shitjeve totale ra 16.6% në tre mujorin e tretë të 2023-shit.

Cikli i krizës i shkaktuar nga ekuilibri i disfavorshëm i euros kundrejt lekut, i cili me rënien e tij shkaktoi një dekurajim të prodhimit dhe eksportit, ka nisur një trend negativ për industritë e vendit, të cilat janë përballur me kosto më të larta dhe fitime tepër të ulëta.

Rënia më e madhe ishte për industrinë e përpunimit të lëkurës dhe të këpucëve, e cila nga tremujori i 2022 e deri në tre mujorin e 2023, indeksi i shitjeve neto ra me 27%.

Përveç ndikimit negativ të kursit, sektori u dëmtua dhe nga një rënie e kërkesës së tregut italian për manifakturën shqiptare.

Gjithashtu, edhe industria nxjerrëse ka pësuar rënie, ku nga 130 shitje në tre mujorin e 2022, në 2023 sektori gjeneroi një indeks shitje neto vetëm  90.6, duke rënë me 30%. Shitjet neto nga prodhimi i letrës dhe produkteve të tjera derivate gjithashtu zbritën me 17%, të ndjekura nga produktet e përpunimit të drurit, të cilat u shitën 10% më pak.

Produktet elektrike dhe industria e metalurgjisë shënoi gjithashtu 5.9% më pak shitje neto. Nga ana tjetër industria e transportit ajror, agjencitë e udhëtimit, hotelet dhe shërbimet e bareve restoranteve kanë shënuar rritje të shitjeve neto për periudhat referuese, të nxitura dhe nga turizmi i shtuar i huaj i vitit që lamë pas, ku të gjitha këto u rritën respektivisht me 31, 16 dhe 12 për qind.

LEXONI GJITHASHTU:

• Bie prodhimi, rritet çmimi/ Vaji i ullirit në Vlorë, 50% më shtrenjtë
• Vaji i ullirit, si renditet Shqipëria në prodhimin global