Vaji i ullirit, si renditet Shqipëria në prodhimin global

Eksportuesit më të mëdhenj të vajit të ullirit gjatë vitit të kaluar ishin Spanja, Italia, Portugalia, dhe Greqia. Këto shtete, së bashku kontribuuan në 89% të vëllimit të shitjeve botërore. (grafik) Shqipëria, nga ana tjetër është liderja e prodhimit në Ballkanin Perëndimor, dhe prodhimi i saj qëndron në 0.6-1% të prodhimit të ullirit të Bashkimit Europian.

Me këta tregues, një analizë e viteve të fundit, tregon se pemishtet për fermer kanë një madhësi mesatare 0.3 hektarë, disa herë më të ulët se Greqia, ku sipërfaqja mesatare arrin në 1.6 hektarë. Ky fragmentim i tokës, nuk e ndihmon skemën e eksporteve, dhe për këtë sugjerohet që prodhuesit të bashkojnë ngastrat dhe të ngrenë pika rafinimi.

“Unë mendoj se qeveria duhet të ndërhyjë duke krijuar shoqata e kooperativa, për t’u bërë ndërmjetës në tregtimin e vajit të ullirit. Rëndom sot shikojmë nëpër fshatrat e Myzeqesë e Vlorës, që ka tregtarë italianë, të cilët vijnë e blejnë vajin me lekë në dorë, me bidonë plastikë në treg informal. Ne, duke qenë ekonomi e dobët na intereson, sepse e shesim vajin që në momentin e parë, por në afatgjatë është në dëm të fermerëve dhe prodhuesve që merren me ullirin”, thotë Marin Suli, prodhues i vajit të ullirit.

LEXONI GJITHASHTU:

• Vaji i ullirit shqiptar, Italia e shet si produkt të vetin   
• Shqipëria e bekuar me vajin e ullirit