Programi bërthamor i Iranit/ Ministrat e jashtëm evropianë mblidhen sot në Gjenevë

Ministrat e Jashtëm të Mbretërisë së Bashkuar, Francës dhe Gjermanisë pritet të takohen të premten në Gjenevë me homologun e tyre iranian, Abbas Araqchi, në një përpjekje për të rikthyer bisedimet diplomatike mbi programin bërthamor të Iranit.

Ky takim vjen në një moment kritik, ndërsa tensionet mes Izraelit dhe Iranit kanë arritur nivele të rrezikshme dhe Shtetet e Bashkuara po shqyrtojnë mundësinë e përfshirjes ushtarake.

Takimi vjen vetëm një ditë pasi Presidenti amerikan, Donald Trump, vendosi një afat dyjavor për të marrë një vendim nëse SHBA do t’i bashkohet luftës së Izraelit kundër Iranit. Shtëpia e Bardhë konfirmoi se “presidenti do të marrë një vendim nëse do të ndërmarrë sulme kundër Iranit brenda dy javësh”, duke shtuar se kontaktet me Teheranin janë ende aktive dhe ekziston një farë shprese për vazhdimin e negociatave.

Sekretari i Jashtëm britanik, David Lammy, i cili u takua të enjten me Sekretarin amerikan të Shtetit, Marco Rubio, tha se “është koha për t’i dhënë fund skenave të rënda në Lindjen e Mesme dhe për të parandaluar një përshkallëzim rajonal që nuk do t’i sillte dobi askujt”.

Bisedimet në Gjenevë po zhvillohen në të njëjtin qytet ku më 2013 u arrit një marrëveshje fillestare mes Iranit dhe fuqive botërore për të frenuar programin bërthamor të Teheranit, marrëveshje që u kurorëzua në vitin 2015 me një pakt gjithëpërfshirës.

Megjithatë, negociatat e fundit ndërmjet SHBA-së dhe Iranit u ndërprenë kur Izraeli nisi sulmin e tij të papritur ndaj Iranit më 12 qershor, duke e rikthyer krizën në qendër të skenës ndërkombëtare.

LEXONI GJITHASHTU:

• Lufta Izrael-Iran, Rubio bisedon me aleatët e SHBA-së për zgjidhje
• Zëvendësministri i Jashtëm i Iranit: Përfshirja e SHBA-së do sillte ferr për rajonin