Sot Prokuroria e Tiranës ka dhënë pretencën për sherrin që u bë publik pasi Princ Leka kishte filmuar përplasjen me Elian dhe ish-vjehrrin e tij.
Më 25 mars të këtij viti, Princ Leka, ish-bashkëshortja Elia Zaharia dhe babai i saj Gjergj Zaharia u përfshinë në një konflikt të dhunshëm në Oborrin Mbretëror. Palët bënë kallëzime për njëri-tjetrin.
Organi i akuzës kërkon dënimin me 1 vit e 6 muaj burg për Princ Lekën.
Prokuroria po ashtu kërkon edhe për Elia Zaharinë 6 muaj burg dhe 1 vit për babanë e saj. Gjithashtu, Prokuroria kërkon që dënimi t’iu konvertohet në shërbim prove, nëse të tre shpallen fajtor nga Gjykata.
Vendimi i Gjykatës së Tiranës do të jepet në datën 13 dhjetor nga gjyqtarja Migena Laska.
Të tre akuzohen për veprën penale “dhunë në familje”. Princ Leka, Elia Zaharia dhe Gjergj Zaharia janë gjykuar me procedurën e gjykimit të shkurtuar.
Në një reagim për Euronews Albania, Elia Zaharia tha se nuk ka koment për një çështje që është në gjykim dhe se po ndjek në heshtje procesin.
“Unë jam mirë, sot isha prezente pas çeljes së panairit dhe do jem për 3 ditë me radhë në ndjekje të përditshme. Unë pata kënaqësinë dhe privilegjin të prezantoj çeljen e Panarit të 27 të Librit. Komenti që kam është që i ftoj të gjithë në këto 5 ditë feste në ngjarjen më të madhe kulturore në vend. Libri është miku më i mirë, të mundëson të jetosh shumë jetë. Më vjen keq por nuk kam koment, çështja është në gjykim, unë respektoj në heshtje procesin”, tha Zaharia.
