Protesta dhe vota e diasporës, Berisha zbulon planin e PD

Ish-kryeministri Sali Berisha zhvilloi këtë të mërkurë një konferencë me gazetarët, ku u ndal dhe te protesta e opozitës më 8 shkurt, por dhe te ndryshimet ligjore që nevojiten për votën e diasporës.

Berisha i bëri thirrje qytetarëve të bashkohen në tubimin e opozitës këtë të shtunë dhe e cilësoi atë si “protestën e fitores drejt 11 majit”.

“Do të jetë një protestë e fitores.

Do të jetë fryma e fitores, protesta e fitores.

Nuk ka të ndalur tani opozita, nuk ndalet më gjer më 11 maj  ditën e fitores.

Quajeni si të duash, unë nuk kam term tjetër përveçse protesta e fitores”, tha Berisha

Duke u ndalur te vota e diasporës Berisha tha se PD nuk do të lejojë asnjë ndryshim nëse nuk pranohet amendamenti i tyre që emigrantët, të cilët nuk disponojnë dokumente biometrike shqiptare, të mund të votojnë.

“Negociatat janë, Partia Socialiste kërkon të përjashtojë të gjithë shqiptarët me të drejtë vote jashtë Shqipërie, që nuk disponojnë dokumente shqiptare dhe ky është një akt antidemokratik, antikushtetues.

Pasja apo jo e letërnjoftimit apo pasaportës shqiptare nuk ka asnjë implikim me qenien apo jo shtetas shqiptar.

Pra, mund të jesh shtetas shqiptar dhe të mos kesh pasaportë shqiptare, por të kesh dokumente të një, dy apo tre vendeve të tjera që lejojnë dyshtetësi.

Nuk e pranojnë socialistët.

Kështu që unë e deklaroj këtu, asnjë votim, asnjë ndryshim nuk bëjmë nëse nuk pranohet ky amendament i yni, që është krejtësisht pa asnjë lloj anësimi politik, por strikt për të respektuar të drejtën kushtetuese të shqiptarëve jashtë vendit.

Për ne, ky është kushti.

Vota e diasporës vihet në rrezik nëse përjashton dy të tretat e shqiptarëve jashtë vendit.

Ti e bën me këtë qëllim këtë, se këta e shohin që diaspora e urren PS-në. Shqiptarët e kanë turp të kujtojnë narkoshtetin që ka ndërtuar Edi Rama në Shqipëri.

Shqiptarët nuk ia falin të largojë 1 milion persona në 10 vite.

Këta menduan se do ishte ndryshe, por u del krejt tjetër. Ndaj dhe duan tani t’i kufizojnë”, tha Berisha.

LEXONI GJITHASHTU:

• Berisha kërkon komision për Sky Ecc, sfidon Gjiknurin: Betohu që se ke përdorur
• Berisha në Kongresin e CDU në Berlin, takon kandidatin për kancelar të Gjermanisë