Protesta e opozitës: Blindohet kryeministria, efektivët rrethojnë dhe parlamentin

Partia Demokratike dhe aleatët e saj do të zhvillojnë këtë të shtunë, në orën 17:00, një protestë kombëtare përballë Kryeministrisë.

Ky tubim është lajmëruar si vijim i aksionit të mosbindjes civile nga ana e Partisë Demokratike, në një kohë kur prej disa javësh vijon procesi i regjistrimit të diasporës, nga e cila opozita shpreson të vijë një votë proteste.

Mbështetësit e opozitës kanë nisur grumbullimin në ambientet e selisë së Partisë Demokratike, prej nga ku do të marshojnë drejt bulevardit “Dëshmorët e Kombit”.

Ndërkohë, autoritetet kanë marrë masa të rrepta sigurie për mbarëvajtjen e protestës. Forca të shumta policore janë vendosur përreth Kryeministrisë, por edhe në institucione të tjera kyçe si Ministria e Brendshme, Bashkia e Tiranës dhe Kuvendi i Shqipërisë, të cilat në të kaluarën kanë qenë objektiva të protestave të dhunshme. Raportohet se efektivët e policisë janë të pajisur me maska kundër-gaz, për t’u përgatitur ndaj çdo skenari të mundshëm.

Burime nga selia blu e cilësojnë protestën si një shfaqje force nga opozita, ndërsa pritet që grumbullimi të organizohet sipas ndarjeve të përcaktuara nga strukturat e PD-së. Një grup i të rinjve të FRPD-së do të shoqërojë liderin e opozitës, Sali Berisha, dhe pjesën tjetër të lidershipit në marshimin drejt Kryeministrisë.

Protesta zhvillohet në një klimë të tensionuar politike, vetëm pak javë para nisjes së fushatës zgjedhore për zgjedhjet e 11 majit.

LEXONI GJITHASHTU:

• Opozita mban sot protestën kombëtare: Blindohet kryeministria, skenarët e tubimit
• Nis grumbullimi për protestën e PD, policia masa të rrepta sigurie