Protesta e punonjësve të pastrimit, reagon kryetarja e Bashkisë Vlorë

Kryetarja e Bashkisë së Vlorës, Brunilda Mersini, është takuar këtë të mërkurë me punonjësit e sektorit të pastrimit, pas ankesave dhe protestave të njëpasnjëshme për kushtet e punës, vonesat në paga dhe mosdhënien e antidotës.

Takimi u zhvillua në ambientet e ndërmarrjes së pastrimit, ku punonjësit paraqitën shqetësimet e tyre dhe kërkuan zgjidhje konkrete. Pas bisedës me ta, Mersini u shpreh për mediat se bashkia është e angazhuar për të gjetur një zgjidhje sa më të shpejtë dhe të drejtë për problematikat e ngritura, duke theksuar se do të ketë verifikime për situatën e pagesave dhe kushteve të punës në këtë sektor.

“Punëtorët ditën e djeshme kanë pasur një ankesë në zyrën e pagave, sepse nuk ka kaluar një fond i quajtur “Fondi i kompensimit”, që ata e marrin në vlerë monetare për disa zëra. Ekonomistja e pagave u dha shpjegim punonjësve, duke thënë se ditën e djeshme Thesari ka pasur probleme me sistemin me sistemin e afmësisë dhe ka qenë pengesë e pagesës drejt bankës. Sot sistemi ka kaluar, sipas informacioneve nga Zyra e Thesarit, dhe punonjësit brenda orës 1 do të jenë në bankë për të tërhequr lekët”, u shpreh kryetarja e Bashkisë.

Sakaq, ajo theksoi se prioritet mbetet respektimi i të drejtave të punonjësve dhe garantimi i një shërbimi dinjitoz për qytetin, ndërsa u premtoi protestuesve se shqetësimet e tyre nuk do të mbeten pa përgjigje nga ana e Bashkia e Vlorës.