Protesta ‘në zemër’ të Brukselit, fermerët kërkojnë ndryshimin e marrëveshjeve të BE

Zemërimi i fermerëve u dëgjua sërish pranë institucioneve evropiane. Këtë herë më pak njerëz dhe më pak traktorë u mblodhën rreth godinës ku po takoheshin ministrat e Agrikulturës.

Ata protestuan kundër akordeve për tregtinë e lirë, rregullave të reja për ambientin, barrën administrative të lidhur me subvencionet, por jo vetëm.

“Protestojmë kundër rregullave të çmendura evropiane dhe ndërhyrjes në natyrë. Ne jemi njësh me natyrën dhe jo kundër saj. Mediat na portretizojnë sikur jemi kundër, por kjo nuk është e vërtetë”, tha një fermer.

Por këtë herë është ndryshe. Gjatë protestave të shkurtit, fermerët u takuan si me presidenten e Komisionit Evropian, ashtu dhe me ministrat e Agrikulturës.

Komisioni pranoi disa nga kërkesat e tyre dhe zbuti disa nga rregullat mjedisore, si heqjen e detyrimit për të shtyrë korrjet dhe reduktimin e burokracive. Por për fermerët, këto janë të pamjaftueshme.

“Protesta është e nevojshme pasi kemi shumë njoftime, por konkretisht kemi pak zgjidhje. Ka njoftime për çështje të caktuara, por jo për ato më të rëndësishmet, si të ardhurat dhe marrëveshjet ndërkombëtare”, tha Olivia Leruth, Federata e Agrikulturës.

Nga rregullat e reja dhe më fleksibël përfitojnë fermerët e vegjël. Ata me më pak se 10 hektarë nuk do të jenë subjekt i kontrolleve dhe penaliteteve.

LEXONI GJITHASHTU:

• Qindra traktorë në kufirin çeko-sllovak, protesta nga fermerë nga 10 vende evropiane
• Vazhdon protesta e fermerëve në Spanjë. Rreth 1000 traktorë nisen drejt Barcelonës