A u politizua protesta për 7-vjeçaren, Baçi: Edhe deputetët e PS duhet të ishin aty

Deputeti i Partisë Demokratike, Luan Baçi e cilësoi jo vetëm normale, por edhe detyrim praninë e përfaqësuesve të opozitës në protestën e organizuar nga shoqëria civile për vrasjen e 7-vjeçares në Himarë.

Në një intervistë për Euronews Albania, Baçi tha se politikanët si përfaqësues të popullit dhe duhet të jenë kudo është shqetësimi i tyre, ndërsa theksoi se edhe deputetë të PS dhe partive të tjera duhet t’i ishin bashkuar asaj proteste.

“Politika nuk duhet të qëndrojë jashtë, sepse të gjitha këto ngjarje janë politike. Politika e shkaktoi këtë ngjarje dhe shumë të tjera të rënda, si vdekjet nëpër burgje apo arroganca e policëve. Ndaj politikanët duhet të jenë pjesë. Edhe deputetët e PS dhe partive të tjera duhet të ishin në atë protestë kundër Drejtorisë së policisë që justifikojnë veprimin e ish-policit si pakujdesi. Kjo është një vrasje me dashje, vret arroganca e shtetit”, tha deputeti i PD.

Një 7-vjeçare humbi jetën mesditën e 2 gushtit në Himarë, teksa pushonte me familjen e saj.

E mitura u përplas për vdekje teksa ishte në breg, nga mjeti i fuqishëm motorik që drejtohej nga ish-shefi i komisariatit të Himarës, Arjan Tase.

LEXONI GJITHASHTU:

• Të hënën protesta e radhës për vdekjen e 7-vjeçares në Himarë
• ‘Çuçin do e shkarkoja për 4 minuta’, Berisha në protestë: Rama s’ka ndjeshmëri