Presidenti i Serbisë i ka akuzuar shërbimet e huaja të inteligjencës se po përpiqen ta rrëzojnë atë pas përhapjes së protestave në vend dhe ka thënë se ai nuk do të largohet nga vendi si lideri i rrëzuar sirian Bashar al-Assad, shkruan agjencia AP.

AP thekson se të martën, presidenti Aleksandar Vuçi# ka publikuar një mesazh përmes Instagramit në të cilin thotë se do të luftojë për Serbinë dhe do t’i “shërbejë vetëm popullit të tij serb dhe të gjithë qytetarëve të tjerë të Serbisë”, dhe se “ai kurrë nuk do t’u shërbejë të huajve që kërkojnë të mposhtin, poshtëroni dhe shkatërroni Serbinë”.

Kundërshtarët e liderit populist atë e krahasojnë me Assadin, i cili ka ikur në Moskë pas një ofensive të shpejtë nga rebelët që i dha fund sundimit 50-vjeçar të familjes Assad në atë vend, shkruan agjencia AP. Kjo agjenci shton se kundërshtarët në Serbi e krahasuan Vuçiçin me Assadin dhe diktatorë të tjerë botërorë, duke parashikuar se edhe ai mund të largohet nga vendi nëse humbet kontrollin e tij të fortë në pushtet mes protestave të nxitura nga rrëzimi i çatisë në stacionin e trenit në Novi Sad, ku më 1 nëntor vdiqën 15 persona, transmeton Paparaci.

AP tregon se demonstratat në Novi Sad, Beograd dhe qytete të tjera për shembjen vdekjeprurëse të çatisë fajësojnë korrupsionin e përhapur në vend, e cila çoi në punë të pakujdesshme për rinovimin e stacionit hekurudhor në Novi Sad, si pjesë e një marrëveshjeje më të gjerë me Kompanitë shtetërore kineze të përfshira në disa projekte infrastrukturore në këtë vend ballkanik.

Rrënimi i çatisë shkaktoi pakënaqësi të gjerë me sundimin autokratik në rritje të Vuçiçit, duke reflektuar kërkesat publike për ndryshime demokratike në vend, shkruan AP.

Agjencia tregon se Vuçiçi ka deklaruar në video-mesazhin e tij se përhapja e protestave, të cilave u janë bashkuar së fundmi studentët, “është financuar nga Perëndimi me synimin për ta rrëzuar atë dhe qeverinë e tij duke përdorur taktika të ndryshme hibride të përdorura për të minuar vendin”.

AP citon gjithashtu fjalët e Vuçiçit se në ditët dhe javët në vijim, ai do të zbulojë në detaje se sa para “janë paguar vitet e fundit për të shkatërruar Serbinë” dhe “për ta kthyer atë në një shtet vasal që nuk do të merrte vendimet e veta apo të zgjedhë të ardhmen e vet, por duhet të dëgjojë dhe t’i shërbejë dikujt tjetër.

AP kujton se vendi ballkanik po kërkon zyrtarisht anëtarësimin në BE duke ruajtur lidhje shumë të ngushta me Rusinë dhe Kinën dhe se Vuçiçi, i cili pretendon “neutralitet politik për Serbinë”, ka premtuar vazhdimisht se ai kurrë nuk do t’i bashkohet sanksioneve perëndimore kundër Moskës për shkak të pushtimit të saj në Ukrainë.

Agjencia tregon se në një lëvizje që mund ta largojë më tej Serbinë nga ambiciet e saj të deklaruara për anëtarësim në BE, një projekt-ligj i paralajmëruar në Parlamentin serb që do të krijojë një regjistër të të ashtuquajturve mercenarëve të huaj, i ngjashëm me ligjin kufizues të miratuar në Rusi.

LEXONI GJITHASHTU:

• Qindra qytetarë në Serbi protestojnë para Presidencës gjatë fjalimit të Vuçiçit
• Protestat në Beograd, Vuçiç: Nuk do largohem nga vendi siç bëri Assadi