Protestë në Postribë, banorët: Gurorja ka dëmtuar burimin e ujit

Banorët e Postribës në Bashkinë e Shkodrës kanë protestuar ditën e shtunë për shkak të punimeve që po kryhen në guroren e Rrësekut. Firma mori leje në vitin 2017 por punimet sipas protestuesve kanë shkaktuar dëmtime në burimin e ujit të pijshëm të zonës.

“Jemi 15 mijë banorë që konsumojmë këtë ujë. Na është prishur gjithë jetesa nga punimet në gurore. Nuk po na gjejnë rrugëzgjidhje, na kanë lënë në dorë të dytë”, shprehen banorët.

Nga dëmtimet në burimin kryesor, më shumë se 15 mijë banorë të Postribës nuk furnizohen me ujë të pijshëm.

“Që ditën e parë që kanë filluar punimet ne gurorë, uji është bërë i pakonsumueshëm”, thotë një tjetër banor.

Banorët thonë se i kanë dërguar shkresa të gjitha institucioneve lokale dhe atyre qendrore, e megjithatë puna në gurore vazhdon. Nëse gurorja nuk mbyllet ata shprehen se do të përshkallëzojnë protestën.