Protestë në Serbi për Kosovën, ekstremistët kërcënojnë Vuçiçin: Do të të vrasim!

Të ashtuquajturit patriotë zhvilluan në Serbi një protestë para parlamentit dhe kërcënuan hapur se do të vrisnin presidentin Vuçic dhe të gjithë bashkëpunëtorët e tij.

Ekstremistët e djathtë serbë protestuan kundër autoriteteve në vend dhe dialogut me Kosovën, që zhvillohet nën ndërmjetësimin e Bashkimit Evropian.

Në këtë protestë, të organizuar nga organizata e ekstremit të djathtë, “Patrulla e Popullit”, u panë edhe simbolet e grupit mercenar rus, Ëagner.

Xhandarmëria serbe i ndaloi ata që të hynin në ndërtesën e Presidencës serbe.

Duke uruar qytetarët për festën kombëtare presidenti serb  tha se kjo protestë nuk  meritonte vëmendje të veçantë dhe se shteti nuk do te lejonte dhune.

‘Gjithçka që bëjnë, e bëjnë kundër Serbisë dhe kundër popullit të tyre. I keni quajtur pro-rus. Nuk e di nëse janë pro-rusë, por e di që janë antiserbë, sepse bëjnë gjithçka kundër popullit të tyre” u shpreh Vucic.

‘Mesazhi im për qytetarët është që të mos shqetësohen dhe se shteti do të sigurojë gjithçka për qytetarët . Duhet ta dini se do të ketë edhe shumë përpjekje të tilla. Shumë në botë do të përpiqen të shkatërrojnë stabilitetin e Serbisë. Të gjithë duhet ta mësojnë, se në Serbi qytetarët vijnë në pushtet dhe largohen nga pushteti me zgjedhje”, theksoi  Vuçic.

“Dua t’i them popullit tonë në Kosovë se ne jemi me ta, do ta mbrojmë Kosovën dhe do ta mbrojmë Serbinë”, e përfundoi fjalën presidenti serb.

Vucic u zotua se nuk do te lejojë që “banditët” të kërcënojnë demokracinë e Serbisë.