Prova të reja për Pjerin Xhuvanin, kërkohet arrestimi i efektivëve të ‘Shqiponjave’

Prokuroria ka zbuluar prova të reja për vrasjen e Pjerin Xhuvanit, ngjarje e ndodhur 2 vite më parë në qytetin e Elbasanit, gjatë fushatës elektorale.

Duke u bazuar mbi gjetjet e reja organi i akuzës ka kërkuar të caktohet masa arrestit në shtëpie për 6 efektivët e forcave ‘Shqiponja’, Dedion Durakun, Pëllumb Biçakun, Erion Ballën, Erion Meçjen, Donald Dedjen dhe Besmir Kadiun.

Në përfundim të seancës së sotme avokatja e familjes Xhuvani tha për median  se prokuroria arriti të zbulojë se policët ishin në dijeni për furgonët e strukturave mbrojtëse të PD-së dhe se Arbër Paplekaj ka qënë i armatosur.

Kanë qenë këto dy detaje të reja që kanë nxitur prokurorinë të bëjë kërkesën e re për 6 efektivët, gjë që pritet të shqyrtohet më 24 shkurt, ku do të jetë dhe seanca e radhës .

Kujtojmë se gjatë  seancës së kaluar policët pranuan se thjesht kanë kryer transportin e mjeteve nga Tirana drejt Elbasanit dhe se nuk kishin dijeni mbi ngjarjen.

Eksponenti i Partisë Socialiste Pjerin Xhuvani mbeti i vrarë në Elbasan pasi u qëllua me armë nga Arbër Paplekaj, shoqëruesi i kreut të listës së Partisë Demorkatike, Gazment Bardhi. Në ngjarjen e 21 prillit 2021, mbetën të plagosur edhe katër persona të tjerë, mes tyre dhe një efektive policie.

LEXONI GJITHASHTU:

• Vrasja e Pjerin Xhuvanit, shtyhet sërish seanca në ngarkim të Arbër Paplekajt
• Shtyhet gjyqi i Arbër Paplekaj, ish-efektivi i akuzuar për vrasjen e 21 prillit 2021